التخطي إلى المحتوى
طالبة ازهرية تكتب : المدينة الجامعية علمتني
المدينة الجامعية علمتني

المدينة الجامعية علمتني

كتبت احدى طالبات جامعة الأزهر الشريف مقال كوميدي بعنوان ” المدينة الجامعية علمتني ”

وتحكي فيه الطالبة الأزهرية عن حياتها في المدينه الجامعية وما تعلمته ..

 

وقالت :
– علمتني ان سيرفيس الأكل أهم من طقم الصيني بتاع أمى اللي حطاه في النيش

 

-علمتني اقشر البرتقان بالمعلقه واقلب الشاي بالسكينه

– علمتني ان الفينو بالجبنه هي الاكله الرسميه، والبيض هي الاكله الدسمة بتاعتنا .

 

– علمتني ان الصابونه مكانها في المكتب مش الحمام علشان لو سبتها هتتاخد وربنا.. اه والله زي مبقولك كده

 

– علمتني اعمل منشر في شيش الشباك ويبقى اجدع من البلكونه بتاعت البيت .

– علمتني ان صدر الفرخه اكبر من الورك.. علشان كده الناس بتتخانق عليها.

 

– علمتني ان اللحمه اللي مغسوله بالفنييك هتنضف معدتك.

 

– علمتني ان اليوم اللي بيشغلوا فيه المياه السخنه… بيبقى اليوم العالمي للنضافه في المدينه كلها، والطوابير على الحمامات بتبقى لا تعد ولا تحصى وغالباً هما يومين اتنين بس في الاسبوع، واللي النضافه مقطعه بعضها عنده يبقى يسخن مياه في البويلر (الغلايه) ويعيش حياته في الحمام

 

– علمتني ان البلكونه هي المكان الرسمي لمكالمات العشاق طوول السنه حتى لو الجو تلج

 

وبتتحول بقدرة قادر سنتر للمذاكرة خلال اسبوعين الامتحانات.

 

– علمتني ان لو معايا رغيف عيش اقسمه على 4 وناكل ونشبع كلنا برغيف واحد، او نكمل أكل في احلامنا واحنا نايمين.

 

– علمتني ان كارنيه المدينة أهم من الكتب اللي شايلنها.

 

– وعلمتني ان اللي ليه واحد يعرفه في الطابور أهم من اللي معاه واسطه تدخله الحربية. طابور ممكن تقف فيه نص ساعة وربنا .

 

– ان الشاي هو المشروب الشعبي… ولو انت ابن ناس هتجيب معاك نسكافيه.

– المدينة عودتني اصحى من الساعه 8 اجباااري، حتى لو ماعنديش محاضرات. بس الهرج والمرج اللي بيشتغل في الاوضه كفيل انه يقومك لو حتى كنت ميت

 

– علمتني ان الدولاب متعدد الاستخدامات.. كخزانة ملابس عادي ، اكل مايضرش، كتب مافيش مشكله، جزم برضوا عادي.

إقرأ أيضا :   مراجعة مادة البلاغة القسم الأدبي 2017 إعداد الأستاذ أحمد حسنين ( امتحانات متوقعة )

 

– علمتني ان اكبر مهمه هي انك تتصاحب علي بتوع الامن والمشرف وتخليهم يعرفوك وانت تدخل من غير ماحد يقرفك ويشوف كارنيهك وتلاقيك تمام من غير ماتخرج من الاوضه .

 

– علمتني ان مفيش احلي من اكل امك اللي بتعيب فيه

 

– علمتني ان اللي بيحط ورقه على الباب مكتوب عليها ممنوع الازعاج يبقوا ولاد تنكه ورخمه… وبرضوا الناس هتخبط على الأوضه وتجري.

 

– علمتني انك لو عايز تجيب أكل شوف اي حد نازل وخليه يجيبلك معاه بدل ماتنزل .

 

– علمتني ان اسوأ يومين ف تاريخ المدينة هو يوم التسكين ويوم الإخلاء النهائية .

 

– علمتني اني هكسب صحاب من جميع انحاء الجمهورية

 

– علمتني في بداية السنة احجز الاول عشان تاخد أوضتك الاول وتعرف تظبطها وتجيبلها مراتب وحجات اكتر واحسن.

– علمتني اني اصحى الساعه 3الفجر على صوت زعييق واغاني من الاوض التانية ( عيال عندها كهربا زيادة في المخ، بتعمل ماس في نص الليل يخليها تطلع بزغروطه) .

 

– علمتني ان مكتب المذاكره يمكن استخدامه كسفرة او تلاجه . (تلاته في واحد يعني)

 

– علمتني انك لو عاوز تعذب معدتك.. تأكلها مكرونة المدينة.

– علمتني ان الحاجه اللي تنساها في الحمام اصبحت ملك غيرك منذ لحظة تركها.

 

– علمتني ان القطط اكتر من عدد الطلبة في المدينة

 

– علمتني اني اتفرج على اللاب مع حوالي 30 واحد

 

– علمتني ان المعلقه والسيكنه والطبق ملكية عامه مسموح للجميع استعمالها.

 

– علمتني ان السرير اللي تحت للي عايز ينام يعمل ستارة وينام براحته من غير معاناة مع النور

 

-علمتني ان الجزم مكانها تحت السرير.. ولو نزلت تدور على بتاعتك هيغمى عليك من الريحه

 

👈 وأنت قولنا علمتك ايه ؟!

ملخص
تاريخ المراجعة
تقييم المؤلف
51star1star1star1star1star

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *